Kagere Meddie aranyomoza amakuru amwerekeza muri APR FC

Yanditswe na:IRAKIZA Longin kuya: 2020-08-26 18:33:40


Rutahizamu mpuzamahanga w’Umunyarwanda, Meddie Kagere, yanyomoje amakuru avuga ko yaba amaze iminsi mu biganiro na APR FC, kugira ngo azayikinire mu mwaka utaha w’imikino.

 

APR FC ifite intego yo kugera mu matsinda ya CAF Champions League mu mwaka utaha w’imikino, iravugwamo amazina atandukanye arimo Meddie Kagere na Tuyisenge Jacques uheruka gutandukana na Petro Atlético.

Mu minsi ishize nibwo amakuru yacaracaye ku mbuga nkoranyambaga avuga ko Kagere Meddie ukinira Simba SC yo muri Tanzania, yaba agiye kujya muri APR FC.

Ibi byahuzwaga ko no kuba uyu rutahizamu w’ikipe y’Igihugu ’Amavubi’ amaze iminsi atabona umwanya uhagije wo gukina muri iyi kipe yo muri Tanzania, nubwo ari we wabaye umukinnyi watsinze ibitego byinshi mu myaka ibiri ishize muri Shampiyona ya Vodacom Premier League.

Aganira na B&B FM, Meddie Kagere yavuze ko kuba adaheruka kugaragara mu kibuga atari impamvu z’uko yasubiye inyuma, adahari se cyangwa ashaka kuva muri Simba SC, ahubwo ari uko umutoza w’iyi kipe, Umubiligi Sven Vandenbroeck, atamukunda.

Ati “Ikibazo si njyewe, si abakinnyi dukinana, si n’izindi mpamvu, ahubwo ni umutoza wenyine.”

Uyu mugabo w’imyaka 34 y’amavuko, amaze imyaka ibiri y’imikino yikurikiranya aba umukinnyi watsinze ibitego byinshi muri Tanzania, aho yashyizeho agahigo ko gutsinda ibitego 23 mu mwaka w’imikino wa 2018/19 mu gihe mu 2019/20 yatsinze ibitego 22.

Abajijwe ku bijyanye n’amakuru avugwa ko yaba agiye kujya muri APR FC, Kagere yagize ati ”Sinzi aho abantu bakura amakuru, barayihimbira. Keretse niba hari undi Kagere urimo gusinya amasezerano! Njye ni ibintu bitigeze binza mu mutwe nari mwe [gusinyana amasezerano na APR].“

“Kenshi mba mbyumva bicaracara hanze aho. Ni ibihuha kandi nubwo nabaga muri Gor Mahia F.C, byaravuzwe ariko ntikwari ukuri.”

Kagere Meddie ni rutahizamu umaze igihe kitari gito mu mupira w’amaguru, dore ko yanaciye mu makipe akomeye mu karere nka Rayons Sports, Kiyovu Sports, Police FC, Mukura Victory Sports na Gor Mahia.

Uyu mukinnyi usigaje amasezerano y’umwaka umwe muri Simba SC, avuga ko atazi niba azakomezanya nayo ubwo azaba arangiye cyangwa azajya ahandi. Azam FC ni imwe mu makipe bivugwa ko amwifuza.

 

Powered by Froala Editor


Tanga Igitekerezo


Ibitekerezo

Ba Uwambere Mugutanga Igitekerezo